Makdem- i Yar transkripsiyon

Pervāne-i zerrīn gibi her zühre-i zerrīn

Titrerdi zümrüd-geh-i lerzān çemende , 

Çaġlardı leb-i sīm-i ḫıyābān-ı semende

Bir çeşme-i billūr ile bir cūy-i billūrin ;

Düşmüşdi siyeh berg-i şebe şebnem-i sīmin :

Şebnem gibi titrerdi  ḳamer leyl üzerinde ;

Bir şeb-pere-i ḫufte bir āhū yı çerende

Virmişdi bu nüzhen-gehe bir vaḥşet-i nermīn ...

Āhū ile şeb-pere vü evrāḳ ile azhār

Nā-gāh fıṣıldaşdı leb-i āb-ı revānda

Zīrā şu perī-ḫāneye ḳarşı bu evānda
 

Ey dürr-i yetīm-i ṣadef-i şefḳatim , ey yār

Sen bir meh-i ẕī-rūḥ gibi yükseliyorduñ ,

Muẓlim ḳorunuñ ẓıllı içinden geliyorduñ .